أدارة الـ State بمرونة وسرعة مع Zustand

[x32x01]

بعد ما شرحت البوست ال فات الـ Redux بكل تفاصيله وتشعباته، البوست ده هنشرح حاجه اخف وأبسط: Zustand. مكتبة هتسهل عليك إدارة الـ state في مشاريع الـReact من غير وجع دماغ.

لو حسيت إن الـ Redux تقيل أو معقد وبتكتب كود كتير عشان تعمل حاجة بسيطة فأحب أقولك إن مع Zustand الموضوع بيبقى أسهل وده من غير ما تفقد أي حاجة من التحكم والمرونة اللي بتحتاجهم.

إيه الحكاية؟
الـ Zustand مكتبة خفيفة لإدارة الـ state بتاع تطبيقات الـReact. يعني لو بتدور على مكتبة تبقى سريعة وسهلة هي الحل. هتديك نفس اللي بيعمله الـ Redux، لكن من غير الـ boilerplate والتعقيد الزيادة اللي مالوش لازمة. الفكرة كلها إنها بتخليك تدير الـ state بسلاسة.

طيب ليه اختار Zustand؟​

- حجم صغير جدا: المكتبة بحجم خفيف أوي حوالي 1KB، فمش هتأثر على أداء تطبيقك حتى لو كبرت فيه.
- مش هتضيع وقت في إنك تعمل Reducers وActions وتربط كل حاجة مع بعضها زي الـ Redux. مع Zustand هتقدر تدير الـ state بكود بسيط.
- مفيش Boilerplate: لو زهقت من كتابة كود كتير عشان تعمل حاجة بسيطة، فا Zustand هتحللك ده بكود مختصر.
- سواء كان عندك مشروع صغير أو كبير تقدر تستخدم Zustand بسهولة ومش بتحتاج تبني هيكل ضخم زي الـ Redux عشان تعمل إدارة للـ state.

إزاي نستخدمها؟

1- الأول نزل المكتبة:​

npm install zustand

2- دلوقتي هنبدأ نعمل Store لإدارة الـ state:​

import create from 'zustand';
const useStore = create((set) => ({
  count: 0,
  increment: () => set((state) => ({ count: state.count + 1 })),
  decrement: () => set((state) => ({ count: state.count - 1 })),
}));

3- خلينا نربط الـ store ده مع الـ component:​

import { useStore } from './store';
function Counter() {
  const { count, increment, decrement } = useStore();
  return (
    <div>
      <h1>{count}</h1>
      <button onClick={increment}>+1</button>
      <button onClick={decrement}>-1</button>
    </div>
  );
}

الموضوع بسيط، لكن فيه تفاصيل أكتر:
يعني Zustand بتشتغل مع React Hooks ف الموضوع كله بيبقى سلس أكتر، بتستخدم الـ useStore اللي بتعمل زي useState، بس مع مزايا الـ global state management.
- ال Performance عالي: بتقدر تتحكم في الـ state بشكل ذكي جدا مش بيحصل re-render للـ component غير لما الـ state اللي بيتأثر يتغير.
- الـ Middlewares: لو عندك حاجات معقدة زي التعامل مع API requests أو حاجات async، تقدر تضيف Middlewares بسهولة عشان تنظم عمليات الـ state.

ممكن تستخدمها فين؟
الـ Zustand ممتازة للمشاريع الصغيرة والمتوسطة بس كمان هتقدر تستخدمها في مشاريع كبيرة. لو بتعمل تطبيق فيه حسابات مستخدمين أو إنت بتتعامل مع قوائم كبيرة من البيانات هتقدر تزبط الـ state management بسهولة.
ولو شغال على حاجات بتحتاج أدائها عالي ومش عاوز يحصل re-render كتير Zustand هتكون أفضل اختيار ليك لإنها بتديك مرونة في إنك تتحكم في الـ updates بشكل أكثر ذكاء.

- مقارنة سريعة مع Redux:
مع Redux بتحتاج تكتب Reducers، Actions، Dispatchers، وكل حاجة لازم تكون structured ومرتبة بشكل معين. ده مفيد للمشاريع الكبيرة، بس بيخليك تضيع وقت في حاجات بسيطة.
مع Zustand، الموضوع مختصر وفعال الكود أقل بكتير وتقدر تحقق نفس النتائج بسرعة.

الخلاصة:
لو عاوز حاجة خفيفة وسريعة وتساعدك تدير الـ state في تطبيقات الـReact من غير تعقيد جرب Zustand. سواء كان مشروع صغير أو كبير، هتلاقيها سهلة في الاستخدام، ومع الوقت هتقدر تكتب كود أقل وتنجز أسرع.
وبكده نكون خلصنا شرحنا عن الـ Zustand. لو عندك سؤال أو استفسار، اكتب في الكومنتات. ومتنساش تقول رأيك في الشرح!