أكيد سمعت عن حاجة اسمها Load Balancing .. (شرح بسيط)

[x32x01]

أكيد سمعت عن حاجة اسمها Load Balancing
ولو مسمعتش ف ده باختصار زي ظابط مرور بس علي ال web بيضمن إن الrequests بتاعت الuser توصل للمكان الصح من غير ما الدنيا تبقى زحمة أو يحصل مشاكل.
في البوست ده هنتكلم عن 8 أنواع من Load Balancing وهنشرح كل واحدة بمثال بسيط

1. Round Robin ​

إمتى تستخدمه؟ لما كل السيرفرات عندك متشابهة في الأداء.
فكرته: الموضوع هنا بسيط جدًا، كل سيرفر بياخد طلب بالتوالي زي ما بنقول "واحد ورا التاني".
العيب: مش بياخد في الاعتبار إن ممكن السيرفرات تكون مش متساوية في القوة، فالأداء ممكن يختلف.
في NGINX هتعمله كده:

upstream backend {
    server server1.example.com;
    server server2.example.com;
    server server3.example.com;
}

2. Least Connection ​

إمتى تستخدمه؟ لما فيه سيرفرات عندها ضغط أكتر من التانية.
فكرته: بيبعت الطلب للسيرفر اللي عليه أقل عدد من الكونيكشن الشغاله، زي لما تختار أقصر طابور في السوبرماركت الكبيره.
العيب: لو فيه سيرفر أبطأ أو أضعف، ممكن يفضل يحصل عليه ضغط.
في NGINX هتعمله كده:

upstream backend {
    least_conn;
    server server1.example.com;
    server server2.example.com;
    server server3.example.com;
}

3. Weighted Round Robin ​

إمتى تستخدمه؟ لو السيرفرات بتاعتك مختلفة في القوة.
فكرته: زي Round Robin بس بتحدد وزن لكل سيرفر، يعني السيرفر الأقوى بياخد عدد طلبات أكتر.
العيب: محتاج تظبط الأوزان يدوي وتتابعها كل شوية.
في NGINX هتعمله كده:

upstream backend {
    server server1.example.com weight=3;
    server server2.example.com weight=1;
    server server3.example.com weight=2;
}

4. Weighted Least Connection ​

إمتى تستخدمه؟ لو عندك بيئة مختلطة وسيرفرات مختلفة في الأداء.
فكرته: مزيج بين Least Connection و Weighted Round Robin.
العيب: برده محتاج شوية ضبط وتراقبه.
في NGINX هتعمله كده:

upstream backend {
    least_conn;
    server server1.example.com weight=3;
    server server2.example.com weight=1;
    server server3.example.com weight=2;
}

5. IP Hash ​

إمتى تستخدمه؟ لو عايز المستخدم يفضل متصل بنفس السيرفر.
فكرته: بيستخدم الـ IP بتاع المستخدم عشان يحدد السيرفر اللي يروح له.
العيب: التوزيع ممكن يكون مش متساوي ولو السيرفر حصلتله مشكلة مش هيحول المستخدم لسيرفر تاني بسهولة.
في NGINX هتعمله كده:

upstream backend {
    ip_hash;
    server server1.example.com;
    server server2.example.com;
    server server3.example.com;
}

6. Least Response Time ​

إمتى تستخدمه؟ لما السرعة مهمة جدًا.
فكرته: بيبعت الطلب للسيرفر اللي بيرد أسرع. (NGINX مش بيدعمها مباشرة، محتاج تستخدم Modules إضافية زي Nginx Upstream Fair Module.)
العيب: محتاج مراقبة وتولز زياده ممكن تصعب الدنيا حبتين.

7. Random ​

إمتى تستخدمه؟ لما بتجرب حاجة أو عايز تخلّي الأمور عشوائية شوية.
فكرته: بيختار سيرفر بشكل عشوائي. (محتاج Module زي Nginx Random Load Balancer.)
العيب: التوزيع مش متساوي ومش مناسب للسيستيمز الحساسة.

8. Least Bandwidth ​

إمتى تستخدمه؟ لما استخدام الـ Bandwidth مختلف بين السيرفرات.
فكرته: بيبعت الطلب للسيرفر اللي بيستخدم أقل Bandwidth.
العيب: محتاج إعدادات معينه ووتولز تراقب بيها وبتبقي صعبه ومعقدة.

حاجات زيادة بقا و حلوة في Load Balancing
Geolocation-Based: يوجّه الطلبات حسب موقع المستخدم عشان يقلل التأخير (Latency).
Consistent Hashing: يضمن إن الطلبات تفضل تروح لنفس السيرفر حتى لو السيرفرات اتغيرت.
Custom Load Balancing: ممكن تبرمج التوزيع بالطريقة اللي تناسبك باستخدام Scripts أو Lua.

من الاخر بقا
اختيار طريقة Load Balancing المناسبة بيعتمد على احتياجات الابلكيشن بتاعك ... المهم إنك تبقى عارف مميزات وعيوب كل طريقة وتخطط بشكل كويس.
قولي بقى في الكومنتات إيه أكتر طريقة Load Balancing بتستخدمها؟
وازاي ساعدتك في شغلك؟
متنساش بقا تشير (الزر فى الأعلى) وتعمل save للبوست لو عجبك