أهم تخصصات الأمن السيبراني وشرحها

الأمن السيبراني بقى من أهم المجالات في العالم الحديث، وده بسبب التهديدات الإلكترونية المتزايدة زي هجمات DDoS، وبرامج الفدية، وهجمات MITM، والفيروسات الخبيثة.
الهدف منه هو حماية الأنظمة والمعلومات ومنع أي وصول غير مصرح به أو تخريب.

في البوست ده هنتكلم عن أهم تخصصات الأمن السيبراني سواء كنت من فريق الهجوم (Red Team) أو الدفاع (Blue Team).

محلل مركز العمليات الأمنية (SOC Analyst) ​

هو الشخص اللي بيراقب الأنظمة طول الوقت علشان يكتشف أي هجوم إلكتروني محتمل.
بيحلل المخاطر والثغرات، وبيكتب تقارير تفصيلية تساعد في تحسين أمان المؤسسة وسد الثغرات بسرعة.

تحليل البرمجيات الخبيثة (Malware Analysis) ​

المحلل ده بيقوم بعمل هندسة عكسية للفيروسات علشان يعرف طريقة عملها وأضرارها.
بيحدد ازاي تتجنبها في المستقبل، وبيساعد في تطوير برامج مكافحة الفيروسات علشان تكشف التهديدات بدقة أكبر.

اختبار اختراق تطبيقات الويب ​

المختبر بيجرب يهاجم تطبيق الويب زي الهاكر بالضبط، لكن بهدف نبيل
بيكشف الثغرات اللي ممكن يستغلها المخترقين، ويكتب تقرير بالمشاكل وطرق حلها قبل ما تقع كارثة.

تخصص علم التشفير (Cryptography) ​

المتخصص في التشفير بيطور خوارزميات لتأمين البيانات ومنع سرقتها أو التلاعب بيها.
كمان بيحلل أنظمة التشفير الحالية ويدور على أي ضعف فيها.

اختبار اختراق الشبكات (Network Pentesting) ​

بيستخدم أدوات وأساليب احترافية علشان يختبر قوة الشبكة ضد أي اختراق.

أنواع اختبار الشبكات:​

• اختبار الشبكات اللاسلكية
• اختبار داخلي
• اختبار خارجي

التحقيق الجنائي الرقمي (Digital Forensics) ​

المحقق الرقمي بيجمع الأدلة الرقمية من الأجهزة بعد أي هجوم سيبراني.
الدليل ده ممكن يُستخدم في المحكمة علشان يثبت الجريمة ويكشف المهاجم.

أمن الحوسبة السحابية (Cloud Security) ​

بيحمي البنية التحتية السحابية من الهجمات، وبيضمن إن البيانات محفوظة وآمنة حتى في حالة الاختراق أو فقدانها.
كمان بيمنع انتشار الملفات الضارة داخل السحابة.

أمن إنترنت الأشياء (IoT & OT Security) ​

بيحمي الأجهزة الذكية والأنظمة التشغيلية زي خطوط الإنتاج وأجهزة الاستشعار.

الفرق بين IT و OT:​

• OT: بيحمي المعدات المادية زي الآلات.
• IT: بيحمي البيانات والسيرفرات والأجهزة.

اختبار اختراق تطبيقات الهاتف ​

الخبير هنا بيقيم أمان تطبيقات الموبايل ضد أي هجمات محتملة.
بيستخدم أدوات متقدمة لاكتشاف الثغرات وتأمين بيانات المستخدمين.

تخصص الـ DevSecOps ​

الـ DevSecOps بيركز على دمج الأمان في عملية تطوير البرمجيات من البداية.
يعني الأمان مش خطوة بعد التطوير، بل جزء من كل مرحلة، وده بيوفر وقت وتكلفة ويحسن جودة الكود.

الاستجابة للحوادث (Incident Response) ​

فريق الاستجابة بيتعامل مع الهجمات بعد وقوعها.
هدفهم الأساسي تقليل الخسائر وسد الثغرات بسرعة علشان النظام ماينهارش.

صيد التهديدات (Threat Hunting) ​

صائد التهديدات بيبحث يدويًا عن الهجمات اللي لسه محدش اكتشفها.
بيكتشف الهجمات المتخفية قبل ما تسبب أي ضرر، وده بيفرق عن الاستجابة للحوادث اللي بتيجي بعد الهجوم.

أمن قواعد البيانات (Database Security) ​

بيحمي قواعد البيانات من الاختراق أو الفيروسات أو برامج الفدية.
كمان بيمنع انتشار البرمجيات الضارة داخل الشبكة، وبيحافظ على سرية البيانات الحساسة.

التحليل الأمني السيبراني (CyberSecurity Analysis) ​

بيحلل نشاط الشبكة علشان يكتشف أي سلوك مريب.
بيعمل تقارير دورية لتقييم مستوى الأمان وتحديد المخاطر المحتملة.

أمن نقاط النهاية (Endpoint Security) ​

بيركز على حماية الأجهزة اللي بتتصل بالشبكة زي الهواتف والحواسيب.
بيمنع الاختراقات قبل ما توصل للأجهزة، وبيكشف الهجمات في مراحلها الأولى.

الخلاصة ​

مجال الأمن السيبراني ضخم ومتجدد كل يوم، وكل تخصص فيه ليه دور حيوي في حماية البيانات والبنية التحتية.
سواء نفسك تكون محلل، مخترق أخلاقي، أو خبير تحقيق جنائي، كل مسار فيهم بيقربك من هدف واحد:
تأمين العالم الرقمي من المخاطر.