احذر شراء باكلينكات رخيصة تدمر موقعك

شهادة وفاة موقعك بـ20 دولار فقط ​

مقدمة لازم تعرفها ​

لو حد عرض عليك 1000 Backlinks بـ20 أو 30 دولار… فخليني أقولك بصراحة:
أنت كده بتشتري شهادة وفاة موقعك بإيدك!
ليه؟ لأن جوجل مش بيقيس النجاح بعدد اللينكات، لكن بجودتها وأهميتها.

الناس نسيت هدف الـBacklinks ​

للأسف، أغلب الناس - وحتى اللي بيقولوا على نفسهم خبراء SEO - بقوا يتعاملوا مع الروابط الخلفية كأنها سلعة بالكيلو
لكن الهدف الحقيقي منها هو بناء ثقة الموقع عند جوجل مش زيادة رقم في الأدوات.
تخيلها كده:
الـBacklink زي “واسطة” في الشغل.
لو جالك توصية من شخص محترم ومصدر موثوق، جوجل هيحترمك.
لكن لو الواسطة دي من أي موقع عشوائي؟ جوجل هيشك فيك وهيعاقبك.

الفرق بين الكمية والجودة ​

الموضوع مش بعدد اللينكات، لكن بجودتها.
فيه مواقع عندها ملايين الـBacklinks ومفيش زيارات!
وفيه مواقع عندها 100 لينك بس وزوارها بالآلاف.
السر؟ جودة اللينكات ومصدرها.

إزاي تعمل Backlinks صح ​

اتبع الخطوات دي وهتشوف فرق كبير في السيو والأرشفة:

1. اهتم بالمحتوى أولًا ​

قبل ما تفكر في أي باكلينك، لازم يكون عندك محتوى قوي وقيم.
جوجل مش هيدعم موقعك لو المحتوى ضعيف أو منسوخ.

2. خليك طبيعي ​

بلاش تبين لجوجل إنك اللي بتعمل اللينكات بنفسك.
اللينك الطبيعي هو اللي يجي من موقع حب محتواك وقرر يشارك لينكك.

3. خليك منطقي في العدد ​

ماينفعش تعمل 1000 باكلينك في أسبوع!
يعني فجأة 1000 موقع شافوك وأعجبوا بيك؟ مستحيل
ابدأ بالتدريج:
شهر 1 = 3 لينكات
شهر 2 = 6 لينكات
شهر 3 = 10 لينكات وهكذا…

4. حافظ على معدل ثابت ​

اللينكات لازم تبقى بمعدل ثابت أو متزايد تدريجيًا، مش دفعة واحدة.
ده بيدي جوجل إشارة إن الموقع بينمو طبيعي مش مصطنع.

5. خليك مرتبط بمجالك ​

الـRelevancy مهمة جدًا.
يعني لو موقعك بيتكلم عن البرمجة، متاخدش لينك من موقع بيتكلم عن الطبخ

6. الجودة أهم من الكمية ​

لينك واحد من موقع موثوق عليه زيارات فعلية أفضل من 100 لينك من مواقع مهجورة.

7. خليك ذكي في الجيست بوست ​

في الجيست بوست، حط لينك واحد فقط في المقال، ومعاه روابط لمصادر تانية زي ويكيبيديا.
بس بلاش تربط بكلمات منافسينك أو تستخدم كلمات مستهدفة لنفسك أكتر من اللازم.

8. افهم الأرشفة صح ​

مش معنى إن اللينك ظهر في Ahrefs أو MOZ إنه اتأرشف!
الأرشفة الحقيقية لما اللينك يظهر في Google Search Console (GSC).
وده مش هيحصل إلا لو اللينك طبيعي وجودته عالية.

9. إياك من الـ PBN ​

لو مش محترف فيها، بلاش تقرب.
خطأ واحد ممكن يخلي موقعك كله يتشطب من نتائج البحث.

10. خليك طبيعي في الـAnchor Text ​

وزّع الكلمات المفتاحية بنسب منطقية:

• 30٪ للكلمة المستهدفة
• 50٪ لكلمات مرتبطة
• 20٪ كلمات خاصة بالبراند

الموضوع مش قانون، لكن الهدف إنك تبدو طبيعي قدام جوجل.

الخلاصة ​

متغركش العروض الرخيصة…
الـSEO مش سباق كميات، ده سباق ذكاء واستمرارية.
اشتغل صح، واهتم بالمحتوى، واعمل روابط بجودة حقيقية، وساعتها جوجل بنفسه هيكافئك