تجاوز الإحباط في البرمجة وابدأ نفسك صح

جالي سؤال من واحد خريج حاسبات ومعلومات، بيشتكي إنه اتخرج واشتغل على نفسه، بس دلوقتي شغال كول سنتر، والسوق مش بيديه فرص حقيقية. كل ما يدور على وظيفة أو حتى internship، بيقابل عوائق زي الخبرة أو البورتفوليو.

حاول يدخل فريلانس، لكن لقى ناس بتخطف الشغل منه، وبتضحك على العملاء، وياخدوا فلوس مقابل شغل جاهز، والعميل أصله مش فاهم. الشخص ده تعب ويأس ومش عارف الحل.

في البوست ده هنعمل breakdown للموضوع ونوضح إزاي تتجاوز الصعوبات دي وتبني نفسك صح.

الواقع الحالي لمجال الـ Development ​

مجال البرمجة دلوقتي مليان ناس كتير بتسمي نفسها Developers أو Programmers، لكن الحقيقة إن نسبة اللي فعليًا فاهمين وبيطبقوا صح لا تتعدى 1%.

يعني باختصار: دخان كتير، من غير كفتة

• ناس كتير بتطلع في لايفات أو فيديوهات على السوشيال ميديا وتدي نصايح معظمها غلط أو منقوصة.
• الناس اللي فعلاً خبرة، بيبقوا مشغولين بشغلهم وحياتهم، ولو حد لجأ لهم هيساعدوا بالمعلومة الصحيحة ومصدرها موثوق.

---

ليه الجيل الجديد بيتلخبط ​

الجيل الجديد ساعات بيتلخبط بين الصح والغلط:

• حتى لو جربت 100 أداة AI، هيفضل عندك نقص في الجزء العملي المبني على معرفة صحيحة.
• ده معناه إن على المدى البعيد، المجال نفسه هينقي الناس: اللي معتمد على الفهلوة والشو هيبان حقيقته، واللي بيتعب ويبني نفسه صح هيكون مطلوب.

---

نصايح عملية عشان تتجاوز المحبطات ​

متفتكرش إن اللي سبقك بالفهلوة كسبان ​

الزمن هيكشف الحقيقة، واللي شغال صح هيبني سمعة قوية وكارير ثابت.

ركز على نفسك ​

• متتركزش مع غيرك، ركز على تطوير مهاراتك المهنية والتسويقية.
• اعمل علاقات مع ناس في مجالك ومتاكد إن معلوماتهم صحيحة.

ارجع للمراجع والوثائق ​

• AI ساعات بيغلط أو بيهبد، فالمصدر الأساسي لازم يكون من Documentation و Official Sources.

اتعلم تسوق نفسك ​

• اتكلم عن إنجازاتك ومهاراتك.
• اعرض بورتفوليو صغير لكن قوي يوضح قدراتك الحقيقية.

جرب مواقع فريلانس مختلفة ​

• واحدة وقعت منك مش نهاية العالم. جرب التانية والتالته لحد ما تلاقي مصدر دخل بالحلال.
• خليك بعيد عن النصب والاحتيال زي اللي شفتهم، ركز على الجودة والمصداقية.

---

الخلاصة ​

• المجال هينقي الناس صح من اللي بيعملوا Show Only.
• اللي بيبني نفسه صح هيكون مطلوب ومتقدم على المدى الطويل.
• الرزق مش بالفهلوة، الرزق بييجي بـ المجهود والحلال والأثر الطيب.
• توكل على الله، وركز على تطوير نفسك ومهاراتك، والفرص الحقيقة هتيجي لك.