تطبيق تليفوني وصلاحياته الغريبة ؟!

أكيد لاحظت إن تطبيق تليفوني بتاع وزارة الاتصالات والمالية حجمه غريب جدًا، حوالي 250 ميجا! وده رقم ضخم على تطبيق كل مهمته يعمل Scan بسيط لرقم الـ IMEI عشان يقولك إذا الموبايل بتاعك معفي من الضريبة ولا لأ.

بس السؤال: ليه تطبيق بسيط كده بياخد صلاحيات كتير وبيحتاج مساحة ضخمة؟

---

تحليل الصلاحيات (Permissions) ​

في البداية، الصلاحيات اللي بيطلبها التطبيق شكلها يخوّف، خصوصًا إنها بتشمل الوصول للكاميرا، الملفات، والموقع.
لكن الحقيقة إن الموضوع مش مريب زي ما الناس فاكرة

التطبيق بيستخدم مكتبة اسمها Regula SDK، ودي مكتبة مخصصة لقراءة الـ QR Codes عشان التطبيق يقدر يقرأ رقم الـ IMEI ويبعته للسيرفر ويجيبلك النتيجة.
المكتبة دي لوحدها حجمها حوالي 150 ميجا!
يعني أكتر من نص حجم التطبيق أساسًا داخل في وظيفة المسح الضوئي.

---

طيب والباقي من الـ 250 ميجا؟ ​

الباقي يا سيدي عبارة عن صور، واجهة المستخدم، ملفات داخلية، شوية أكواد تشغيل، وكل الحاجات العادية اللي بتكون جوه أي تطبيق رسمي.

---

هل التطبيق بيجمع بياناتي؟ ​

سؤال منطقي جدًا…
بس الإجابة: لأ

التطبيق مش من النوع اللي بيجمع بياناتك في الخفاء، كل الـ Permissions المطلوبة ليها علاقة مباشرة بالمكتبة البرمجية اللي بيستخدمها.

لكن لازم تبقى فاهم نقطة مهمة
حتى لو الـ IMEI بتاعك جاي من موبايل مستورد، أول ما تحط الشريحة المصرية، رقم الـ IMEI بيوصل لشركة الاتصالات تلقائيًا، لأنهم بيستخدموه لتحديد هوية الجهاز ومكانه وقت الطوارئ.

---

هل ممكن حد يتجسس عليّ عن طريق الـ IMEI؟ ​

نظريًا ممكن شخص يعرف شوية بيانات بسيطة عنك لو قدر يوصل لمعلومات تانية جنب الـ IMEI، لكن الرقم ده لوحده مش كفاية إنه يتنصت على مكالماتك أو يشوف رسائلك.

ببساطة: الـ IMEI هو بصمة الموبايل الإلكترونية، زيه زي رقم الشاسيه في العربية - مهم جدًا بس مش خطر لوحده

---

الخلاصة ​

• تطبيق تليفوني رسمي وآمن.
• حجمه الكبير بسبب المكتبة البرمجية الضخمة.
• الصلاحيات المطلوبة مبررة ومش خطر.
• رقم الـ IMEI بتاعك مهم جدًا، احفظه وماتنشرهوش.

نصيحة أخيرة:
حدث دايمًا تطبيقاتك الرسمية من المصادر الموثوقة (Google Play أو App Store) ومتفتحش روابط مشبوهة بتقولك "افحص IMEI مجانًا"!