تطبيق دردشة بيشتغل من غير إنترنت ولا شبكة محمول ولا ...

تخيل تطبيق دردشة بيشتغل من غير إنترنت ولا شبكة محمول ولا ابراج اتصالات ازاي دا ممكن يحصل؟
السلام عليكم اولاً , دا اللي هنجاوب عليه
تزامناً مع التطبيق اللي تم اطلاقه من جاك دورسي شريك و مؤسس فى تويتر بنفسه وهو تطبيق Bitchat !

لكن... إزاي بيشتغل من غير شبكة؟ وليه بيقولوا عليه مستقبل التواصل في الأزمات؟ وهل هو آمن فعلًا عشان بيطبق فكرة ال decentralized ولا لأ؟ تعال نعرف الحكاية مع بعض.

فكرة التطبيق ببساطة انه بيعتمد على حاجة اسمها Bluetooth Mesh Network يعني كل موبايل عليه التطبيق بيشتغل كأنه وصلة في سلسلة... والرسالة بتتنقل من جهاز لجهاز لحد ما توصل للي انت باعتله كمثال تقريبي

يعني مش لازم يكون الشخص اللي عايز تكلمه جنبك، يكفي بس يكون في ناس حواليك فى نطاق ومدى محدد عندهم نفس التطبيق، وهما هيوصلوا الرسالة نيابة عنك.
طيب النطاق والمدى بتاع البلوتوث دا قد اي ؟ مش قليل أوي

جوه الأماكن المغلقة : قد تصل من 10 لـ 30 متر

في الأماكن المفتوحة + عدد مستخدمين كفاية ممكن توصل لـ 300 متر ودي مش بسيطة

وطبعًا كل ما الناس اللي حواليك زادوا... الشبكة بتقوى، والرسائل توصل أسرع.

مفيش تسجيل دخول, ولا رقم موبايل, ولا إيميل, مفيش سيرفرات تخزن محادثاتك و دا تطبيق قوي جداً للخصوصية وفكرة الdecentralization بالاضافة ان اى داتا بتتبعت مشفرة تشفير قوي جدًا (Curve25519 و AES-GCM) . .

والأجمد؟ أول ما الرسالة توصل... الجهاز بينساها تمامًا كأنها لم تكن يكتفي جاك بكدا فقط أكيد لأ دا لو الشخص اللي بتبعتله مش موجود دلوقتي، التطبيق بيستخدم حاجة اسمها Store-and-Forward يعني اي دا :
يعني يخزن الرسالة مؤقتًا، ولما الشخص يقرب أو يدخل الشبكة، تتبعت له أوتوماتيك.

كمان تقدر تفتح room جماعية ينضم ليها كل اللى حواليك لو اصدقائك او عائلتك وتقدر تتحكم فيها بكلمة سر وتعمل mentions وتفاصيل كتيره حضرتك . .

التطبيق لسه تجريبي حاليًا (TestFlight)
أول 10,000 نسخة خلصوا في لحظات من أول ما جاك نزلها! والنسخة دلوقتي تحت المراجعة قبل الإطلاق الرسمي.
والمفاجأة؟ الكود كله مفتوح المصدر على GitHub لأي حد عايز يطوّر أو يراجع أو يشارك في بناءه.

طب فين الخطر؟ هل التطبيق آمن فعلًا؟
هنا نوقف شوية... ونفكر بهدوء، لأن رغم إن الفكرة عبقرية، في شوية مخاطر لازم تاخد بالك منها:

لو البلوتوث شغال طول الوقت دا خطر!
تشغيل Bluetooth على طول بيفتح باب لهجمات زي: BlueBorne او Bluetooth Spoofing او Impersonation attack وهنا ممكن يوصل لملفات شخصية عندك او يتتبع اشارتك بدقة . .
رسائلك بتعدي على أجهزة ناس تانية !

يعني الرسالة وهي رايحة بتتعدي على أجهزة ناس غرباء. فـ السؤال:
هل تقدر تضمن إن موبايلهم آمن ومش مخترق؟
لو فيه جهاز مخترق وسط الشبكة، ممكن يقدر:
ياخد الداتا وهي ماشية او يستخدم جهازك كنقطة Relay عشان ينقل بيانات تانية وانت مش واخد بالك لكن صعب يقرأها ببساطة بسبب خوارزميات التشفير القوية المستخدمة . .
إذن كنصيحة أمنية سريعة لو هتستخدم التطبيق فى المستقبل انك ما تسيبش البلوتوث شغال دائماً و اقفل التطبيق تمامًا بعد الاستخدام و راقب التطبيقات اللي بتطلب إذن بلوتوث، خاصة الجديدة أو الغريبة و ما تستخدمش التطبيق إلا فى حالات الضرورة او بين اصدقائك وحماية بكلمة سر

الخلاصة هي ان Bitchat فكرة ممتازة، ذكية، ومليانة potential... لكن أي تقنية فيها مميزات، وفيها مخاطر. فلازم توازن بين الراحة والخصوصية.
وخليك عارف دائماً فى التكنولوجيا لو مجانية ف انت السلعة و خصوصيتك هى الثمن ..اتمنى تكون استفدت واستمتعت وشكراً ولو بتحب التفاصيل وكل حاجه بتشتغل ازاي تقدر تبحث عن ال points اللي ذكرتها تحت هنا سلام نراكم فى بوست قادم . .

• Bluetooth Attacks
• Centralization & DeCentralization
• Bluetooth Mesh Network
• BitChat & Concerns

 

تخيل تطبيق دردشة بيشتغل من غير إنترنت ولا شبكة محمول ولا ابراج اتصالات ازاي دا ممكن يحصل؟