قوة الوراثة في البرمجة: ليه الـ Inheritance مهم ؟

فاكر لما البرمجة كانت كلها Copy-Paste؟
قبل ما يظهر مفهوم الـ OOP، أي مشروع كبير كان أشبه بمصنع كله شغل متكرر.
كل ما تحاول تبني حاجة شبه اللي قبلها، تلاقي نفسك بتعيد كتابة نفس الدوال والمتغيرات من الصفر… وكأنك أول مرة تبرمج

تخيل عندك كلاس اسمه Car، وبعدين قررت تعمل كلاس اسمه ElectricCar.
زمان؟ كنت هتكتب كل حاجة من الأول: السرعة - المحرك - العجلات…
حتى لو 90% منهم متشابهين!
وطبعًا ده بيخلي المشروع أكبر، أبطأ، وصعب تعدّل عليه… لأن أي تعديل بسيط هتضطر تكرره في أكتر من مكان

لحد ما ظهر مفهوم الوراثة (Inheritance) وقال:
“ما تكررش نفسك… ورّث اللي عملته.”

---

إيه هو الـ Inheritance؟​

ببساطة:
إنك تعمل كلاس جديد يبني على كلاس موجود، وياخد منه كل الخصائص (Attributes) والدوال (Methods) بدل ما تعيد كتابتهم.

• الكلاس الأصلي → Parent / Base Class
• الكلاس الجديد → Child / Derived Class

الابن بيرث كل اللي عند الأب…
وكمان يقدر يضيف حاجات جديدة أو يغيّر في اللي موجود.

---

مثال بسيط:​

Car:
 - speed
 - color
 - start()
 - stop()

ElectricCar يرث من Car:
 + chargeBattery()

بقي عندك كود أنضف
وقابل لإعادة الاستخدام
وسهل تتعامل معاه

---

ليه الوراثة مهمة؟​

1. إعادة استخدام الكود → تكتب مرة، وتورث بعد كده براحتك.
2. سهولة التعديل → عدلت في الأب؟ كل الأبناء يتحدثوا تلقائيًا.
3. تنظيم المشاريع الكبيرة → كل كائن يبني على اللي قبله بدون فوضى.

وكمان تقدر تستخدم Method Overriding
يعني الابن يغيّر تنفيذ دالة موروثة من الأب لو محتاج سلوك مختلف.

---

ملحوظة مهمة:​

مش كل علاقة بين كائنين معناها Inheritance.
لازم تكون العلاقة فعلاً “أب → ابن” مش بس “شبه بعض”.
غير كده في علاقات أقوى زي Composition، وهتفهمها لما تدخل أكتر في تصميم الأنظمة.