ليه الشركات الكبيرة مش بتدور على لغات كتير

هل الشركات الكبيرة بتدور على اللي عارف لغات كتير؟
أكيد لاحظت إن أغلب الشركات الكبيرة لما تنزل إعلان توظيف بتطلب أكتر من لغة برمجة في نفس الوقت!
يعني مثلًا تشوف إعلان كده

مطلوب Backend أو Mobile Developer
لازم يكون فاهم Node.js / Ruby / Dart / Kotlin

وساعتها بتقول لنفسك:
"تمام، دول أكيد عايزين حد سينيور (Senior) عشان كده طالبين لغات كتير."

وبتبدأ تفتكر إن معنى إنك تبقى سينيور يعني تكون حافظ ٤ أو ٥ لغات برمجة!
فـ تبدأ تتنقل من لغة للتانية علشان تحس إنك بتتطور.
بس الحقيقة؟ ده مفهوم غلط تمامًا!

---

الشركات الكبيرة مش بتدور على "عدد اللغات" ​

اللي بيحصل فعليًا إن الشركات دي مش فارق معاها انت شغال بـ PHP ولا Kotlin ولا Node.js،
هي بتكتب أكتر من لغة في إعلان الشغل علشان تقولك إنهم بيدوروا على حد فاهم الأساسيات والمبادئ، مش حافظ syntax.

يعني إيه؟
يعني لما يكتبوا إنهم محتاجين حد Familiar بـ Node أو Ruby أو Dart،
فهم يقصدوا إنك تكون عارف المبادئ العامة لأي لغة،
زي مثلًا:

• المتغيرات (Variables)
• الدوال (Functions)
• الـ Parameters
• الـ Return values
  كل دي حاجات مشتركة بين كل لغات البرمجة،
  فالشركة مش فارق معاها اللغة، هي عايزة مطور فاهم مش حافظ

---

ليه الشركات الكبيرة بتفكر كده؟ ​

معظم الشركات الكبيرة بتشتغل على مشاريع ضخمة جدًا اسمها SaaS،
ودي اختصار لـ Software as a Service - يعني "البرمجيات كخدمة".

تخيل مثلًا شركة عاملة نظام كبير لإدارة الشركات:

• فيه قسم لإدارة الموظفين
• قسم لإدارة المبيعات
• قسم لإدارة المنتجات

كل جزء من دول يعتبر Service مستقلة،
ممكن تكون مكتوبة بلغة مختلفة حسب طبيعة كل نظام.
فـ الطبيعي جدًا إن كل تيم يشتغل بلغة مناسبة للي بيعمله.

مثلاً:

• ممكن مطور .NET يتعلم PHP في أول 3 شهور.
• أو حد شغال Flutter يتنقل لـ Kotlin.
• أو حد فاهم Kotlin يتعلم Swift بسهولة.

وده لأنهم بيركزوا على الشخص اللي فاهم الـ Principles مش اللغة نفسها.

---

يعني إيه Principles في البرمجة؟ ​

المبادئ أو الـ Principles هي الأساس اللي بتتبني عليه أي لغة أو أي Framework.
لما تكون فاهم المبادئ، ساعتها أي لغة جديدة مش هتكون صعبة عليك إطلاقًا.

تخيل معايا كده:
لو إنت عارف إن في حاجة اسمها Function،
ودي عبارة عن وظيفة بتاخد Parameters وتنفذ شغل وترجع ناتج.

كود بسيط مثلًا:

function sum(x, y) {
  return x + y;
}

console.log(sum(5, 7)); // 🔥 الناتج = 12

اللي فاهم فكرة الـ Function، هيفهمها سواء شافها في JavaScript أو Python أو Dart أو حتى Swift!
لكن اللي حافظ الكود بس، أول ما يشوف لغة جديدة بيحس إنه بيبدأ من الصفر

---

الفاهم بيتنقل بين اللغات بسهولة ​

اللي بيتعلم المبادئ مش بيخاف من التغيير،
بالعكس، بيكون عنده مرونة (Flexibility) يتنقل بين اللغات والتقنيات بسرعة.

يعني بدل ما تكون "مبرمج PHP" أو "مبرمج Kotlin"،
خليك Software Engineer فاهم البرمجة نفسها.

وده معناه إنك:

• تقدر تبني API بـ Node أو بـ Laravel.
• أو تطور App بـ Flutter أو Swift.
• أو حتى تشتغل على Architecture جديدة من غير رهبة.

لأنك ببساطة فاهم الأساس مش الشكل الخارجي.

---

معرفتك بالمفاهيم أهم من اللغة نفسها ​

الفرق بين الشخص اللي فاهم المبادئ والشخص اللي حافظ لغة،
إن الأول بيقدر يحل أي مشكلة مهما كانت الأداة.
يعني لو فاهم Problem Solving،
تقدر تطبق نفس الفكرة بـ C++ أو Dart أو حتى PHP.

البرمجة مش مجرد أوامر…
هي طريقة تفكير، ومجموعة قواعد بتتعلمها مرة، وتطبقها في أي مكان

زي ما الـ Design Patterns و الـ DDD (Domain Driven Design)
هما مفاهيم عامة بتتعلمها مرة وتستخدمها في أي مشروع أو لغة.

---

ركّز على المبادئ مش اللغات ​

بدل ما تضيّع وقتك في حفظ Syntax جديد كل شوية،
خليك تركز على الأساس:

• افهم الـ Software Architecture.
• اعرف الـ Design Patterns كويس.
• اتعلم إزاي تفكر في الحل مش في الكود.
• خليك عارف دورة حياة تطوير البرمجيات (SDLC).

كل ده هيساعدك تكون مطور حقيقي مش مجرد كاتب كود

الخلاصة ​

الشركات الكبيرة مش عايزة حد حافظ لغات برمجة كتير،
عايزة حد فاهم المبادئ، فاهم البيزنس، وبيعرف يحل المشاكل.

اللي بيفهم بيبقى قابل يتعلم أي حاجة جديدة بسهولة،
أما اللي بيحفظ بيقف أول ما يطلع من الـ comfort zone بتاعه.

فـ نصيحتي ليك يا مبرمج:
اتعلم المبادئ… مش اللغات.
ساعتها مش هتخاف من أي Interview ولا أي Tech Stack جديد