مهام الدعم الفني في الشركات بالتفصيل

لو نفسك تشتغل في مجال الـ IT Support أو الدعم الفني، البوست ده ليك
الوظيفة دي من أهم الوظايف في أي شركة، لأنها المسؤولة عن صيانة الأجهزة، تشغيل الشبكات، وتقديم المساعدة التقنية لكل الموظفين. وعلشان تكون جاهز، لازم تعرف بالضبط إيه المهام اللي بتتعامل معاها كل يوم.

1. فرمتة الجهاز​

أول وأبسط مهمة هي فرمتة الكمبيوتر وإعادة تثبيت نظام التشغيل.
دي بتساعد لما الجهاز يكون تقيل أو فيه فايروسات، وبتكون الخطوة الأولى قبل أي إعدادات تانية.

2. تثبيت البرامج الأساسية​

بعد الفرمتة، بييجي دور تثبيت البرامج اللي بيحتاجها كل موظف، زي Microsoft Office أو برامج التصميم أو المحاسبة.
لازم كمان تتأكد إن كل البرامج مفعلة ومحدثة لآخر إصدار .

3. إدخال الجهاز إلى الدومين (Domain)​

الدومين هو الشبكة الداخلية للشركة ، بيسمح بتقسيم الصلاحيات بين الموظفين.
يعني مثلًا، موظف المالية ممكن يدخل على مجلدات معينة، لكن ما يقدرش يدخل على مجلد التقنية، والعكس صحيح.
التحكم ده بيتم من خلال Active Directory.

4. إعداد مجلدات المشاركة (Shared Folders)​

ميزة قوية جدًا في بيئة الشركات
بدل ما تستخدم فلاش لنقل الملفات، تقدر تعمل مجلد مشاركة على الشبكة وتدي صلاحيات لكل موظف حسب الحاجة (قراءة فقط أو تعديل كامل).

5. إخراج الجهاز من الدومين​

لما موظف يسيب الشركة أو الجهاز يتبدل، لازم تخرج الجهاز من الدومين عشان تحافظ على الأمان والسيطرة على الشبكة.

6. إعداد الطابعات الشبكية​

الطابعات في الشركات مش زي طابعتك في البيت!
فيه حاجة اسمها الطابعات الشبكية ، ودي بتخلي أي موظف يقدر يطبع من جهازه من غير ما يوصل الطابعة بكابل USB.
هنا لازم تكون فاهم إعدادات زي الـ Default Gateway والـ IP.

7. حل مشاكل الطباعة المزدوجة​

لو الورق بيطبع وش وضهر بدون قصد، تقدر تصلحها بسهولة
روح على Control Panel → Devices and Printers → Printer Properties
ومن هناك، غيّر الإعداد إلى طباعة على وجه واحد فقط.

8. إعداد الماسحات الضوئية (Scanners)​

فيه موظفين بيحتاجوا يحولوا الأوراق إلى ملفات PDF
لو الماسح مش شغال أو البرنامج بيطلع خطأ، الحل إنك تحذف البرنامج وتحمّله من موقع الشركة الأصلي، وبعدها تضبط الإعدادات وتحفظ الملفات بصيغة PDF.
اسأل الموظف كمان فين يحب تحفظ الملفات، أو اعمله فولدر خاص على الشبكة.

9. إنشاء حساب مستخدم جديد​

ما تعملش أي حساب من دماغك!
لازم يكون معاك طلب رسمي من الإدارة يثبت إن فيه موظف جديد، وبعدها تنشئ له حساب في الـ Domain وتضبط صلاحياته.

10. تعطيل حساب موظف غادر​

برضو، ما تعطلش الحساب إلا لما توصلك أوراق رسمية إن الموظف ترك الشركة.
ده بيحافظ على أمان الشبكة ومنع أي دخول غير مصرح بيه.

11. تغيير كلمة مرور الموظفين​

لو حد نسي الباسورد، عندك طريقتين:

• من خلال Active Directory.
• أو من خلال الموقع الداخلي للشركة (Intranet) لو النظام بيدعم كده.

وظيفة الدعم الفني مش مجرد تصليح أجهزة ، دي مسؤولية ضخمة بتحافظ على استقرار الشركة كلها.
لو فهمت المهام دي كويس، هتقدر تتطور بسرعة في مجالك وتبقى جزء أساسي من البنية التقنية لأي مؤسسة