٧ نصايح قبل أول إنترفيو ليك بعد التخرج

أول إنترفيو بعد التخرج؟ تعالى أقولك تعمل إيه
لو إنت خريج جديد ولسه طالع من Zone الإيميلات اللي كلها “You are rejected”
أو النسخة الحنينة منها "Unfortunately..." اللي معناها باختصار: “كنا عايزينك بس مش هنا”
فمبروك يا نجم إنك وصلت لأول إنترفيو ليك!

بس قبل ما تروح، خُد بالك من الـ ٧ حاجات دول، هيخلّوا التجربة أخف وأفضل بكتير

إدّي لنفسك قيمتها يا نجم ​

إنت مش عبد داخل الإنترفيو، حتى لو حديث تخرج.
خُش بثقة، وإدي لنفسك قيمتها، عشان اللي قدامك يعرف يقدّرك.
الثقة مش غرور، دي احترام لنفسك.

اعرف إنت رايح ليه ​

ادخل الإنترفيو وإنت فاهم إنت عايز إيه:
هل الشغل ده خطوة في مسيرتك المهنية؟
ولا رايح تفكير “أهو أحسن من مفيش”؟
فكّر لقدام، واعمل خطة واضحة إنت مستني إيه من الوظيفة دي، وهل هتوصلك لهدفك فعلاً ولا لأ.

احسبها صح ​

قبل ما توافق على أي حاجة، احسب صافي المرتب اللي هيدخلك بعد خصم المواصلات، الأكل، والوقت اللي بيضيع في الطريق.
اعرف رينج المرتبات في مجالك أونلاين، وشوف الشركة بتدي كام في المتوسط.
حط لنفسك Minimum رقم مناسب، عشان لو اتسألت “متوقع كام؟” تكون جاهز.

شكلك مهم ​

مش لازم تكلف نفسك، بس لازم تبقى مهندم.
الانطباع الأول بيفرق جدًا، فخلي لبسك نظيف، بسيط، ومرتب.

حضّر إجاباتك ​

في أسئلة متكررة في أي إنترفيو.
جهّز ردودك وخليها واثقة وواضحة، عشان ما تبقاش متردد أو تايه.
بوستنا الجاي إن شاء الله هيكون عن أشهر الأسئلة وأفضل إجاباتها

اعمل بحث عن الشركة ​

اعرف كل حاجة عن الشركة اللي رايحها:
الـ Mission والـ Vision بتاعتهم، الخدمات اللي بيقدموها، وأحدث أخبارهم.
ده هيخليهم يحسوا إنك مهتم فعلاً بالشغل، مش مجرد مقدم وخلاص.

اسأل في الآخر ​

في آخر الإنترفيو، لو في حاجة مش واضحة بالنسبالك، اسأل عنها!
زي بيئة العمل، نظام الفريق، أو تفاصيل الوظيفة نفسها.
ده بيدي انطباع إنك جاد ومهتم بالفرصة.

نصايح خفيفة عالسريع ​

• متقلش في الأكل قبل الإنترفيو عشان بطنك ما تعملش مظاهرة
• متشربش 10 لتر ميه قبل ما تدخل
• وصحى بدري عشان ما توصلش متأخر. حاول تكون قبل المعاد بـ10-15 دقيقة.

أول إنترفيو بيكون مقلق؟ أكيد.
بس مع شوية تحضير وثقة بالنفس، هتعدي الموضوع زي الفل
خليك مهندم، واثق، وذكي في إجاباتك، وهتسيب انطباع ما يتنسيش