حصان طروادة أو الـ Trojan

موضوع جديد عن البرمجيات الخبيثة والدور هالمرة على حصان طروادة او ال Trojan
بداية هالأسم غريب مش كده ؟!
طيب ليه تسمى بهذا الاسم ؟!
وأيه هو الضرر الناتج عنه !؟
تابع معي الموضوع لحتى قلك

بداية حصان طروادة هو نوع من البرامج الضارة يلي بتخفي نفسها كبرنامج شرعي أو ملف غير ضار ضمن برنامج تاني او لعبة او اي شي ممكن تحقن فيه ملفات خبيثة وهدف هالنوع من البرامج الخبيثة هو خداع المستخدمين لتثبيته على أجهزتهم بدون علمهم وغالباً ما بتم من خلال الهندسة الاجتماعية أو غيرها من أساليب الخداع التانية والهدف منةهالشي هو التجسس بالدرجة الأولى من خلال اساليب كتيرة متل سرقة كلمات المرور او تسجيل ضغطات الكيبورد او فتح باب خلفي back-door ليقدر المهاجم يدخل بأي وقت للجهاز الضحية

وممكن كمان يقوم بسرقة، نسخ، حذف، حظر، تعديل، البيانات الموجودة ضمن الجهاز ويأثر على موارد الجهاز من ذاكرة ومساحة تخزين وسرعة وأداء وكل شي
طيب شو سبب تسميته هيك؟!

اسم (حصان طروادة) مأخود من القصة الأسطورية لحرب طروادة يلي لجأ فيها الإغريق لحيلة ذكية لاقتحام مدينة طروادة المُحصنة
حيث قاموا بصنع حصان خشبي ضخم وأخفوا جواه جنودهم، بعدها قدموه كهدية لسكان طروادة وبمجرد دخل الحصان فرح أهالي المدينة وخرجوا ظناً منهم انو الحرب انتهت وانتصروا ليخرج بعدها الجنود الإغريق منه ويفتحوا أبواب المدينة لجيوشهم هالشي أدى إلى سقوط طروادة وهالشي هو نسخة عن الضرر يلي بيعمله ال Trojan للأجهزة يلي بدخل عليها

الضرر الناتج عن حصان طروادة ممكن يكون قا*تل لجهاز الضحية لأنو ممكن يوصل للنواة بهالحالة ممكن تضطر انك تشتري جهاز جديد في حال دخل عليه Trojan لهيك يعتبر هو من أخطر انواع ال Maleware

في أنواع كتير مشهورة وغير مشهورة لل Trojan رح احكي عن بعضها باختصار

Remote Access Trojans (RATs)​

هالبرامج بتسمح للمهاجمين بالتحكم ببساطة بأجهزة الضحايا عن بُعد وهالشي بتيح الهم سرقة البيانات وتثبيت برامج ضارة أو تنفيذ أوامر خبيثة او التجسس عالضحية

Keyloggers Trojan​

هالبرامج مهمتها تسجيل كل ضغطة على لوحة المفاتيح على جهاز الضحية وهاد يسمح للمهاجمين بالحصول على معلومات حساسة مثل كلمات المرور وبيانات الحسابات

DDos Trojan​

هاد النوع بيسمح للمهاجم بوضع الضحية ضمن شبكة Botnet وتحويله الجهاز لزومبي بغرض استخدامه بهجمات منع الخدمة على السيرفرات والمواقع

Trojan Downloader​

مهمة هالبرامج تنزيل وتثبيت برامج ضارة إضافية على جهاز الضحية من دون علمه متل فيروسات او ديدان

Banking Trojans​

بتستهدف هي البرامج المعلومات المصرفية والبطاقات الائتمانية للضحية وبتسرق هالمعلومات من خلال اختراق المواقع المصرفية والدفع عبر الإنترنت

Trojan Spyware​

هي البرامج بتجمع معلومات حساسة من جهاز الضحية مثل تاريخ التصفح والإيميلات والملفات وأي شي ممكن تستفيد منه لتعرف معلومات اكتر عن الضحية

Trojan Ransomware​

مهمتها تشفير ملفات الضحية وبتطلب فدية مالية لإعادة فتحها وغالباً دفع الفدية بكون باستخدام العملات الرقمية مثل البيتكوين لأنها صعبة التتبع

Trojan Rootkits​

مهمتها التمويه والتخفي على نظام الضحية وهالشي بجعلها صعبة الاكتشاف والإزالة ويمكن استخدامها للوصول غير المصرح به للأنظمة والبيانات والشبكات

Trojan Backdoors​

هي البرامج مهمتها إنشاء ثغرات بنظام الضحية لتسمح للمهاجمين بالوصول للنظام دون علم الضحية ويمكن استخدامها للتجسس أو تنفيذ أوامر خبيثة

Trojan Clickers​

هي البرامج مهمتها بزيادة عدد النقرات على الإعلانات عالإنترنت وهالشي يؤدي لزيادة تكاليف الإعلان عالضحية وممكن تكون جزء من حملات احتيالية على الإعلانات