CORS ببساطة: حل مشكلة المتصفحات الشائعة

يعني إيه CORS وليه بتضايقنا يا ديفيلوبر؟ ​

إيه رأيك نتكلم شوية عن موضوع مهم ومزعج لكتير من المطورين، وهو CORS!
ركز معايا دقيقتين بس، وهتفهم كل حاجة ببساطة

CORS اختصار لـ Cross-Origin Resource Sharing، وهي ميزة أمنية موجودة في أي متصفح علشان تمنع موقعك من إنه يطلب بيانات من دومين تاني مش مصرح له بيه
وده طبعًا معمول لحماية بيانات المستخدمين ومنع الهجمات اللي ممكن تحصل بين المواقع.

المشكلة بتظهر إزاي؟ ​

تخيل إنك شغال على مشروع وعايز تعرض أخبار من مواقع تانية باستخدام مثلاً RSS Feed.
هتتفاجئ برسالة مزعجة زي:
*"Access to fetch has been blocked by CORS policy"*

ليه؟
علشان المتصفح بيضيف شوية CORS Headers على الـ Request بتاعك، والموقع التاني لازم يرد عليهم بطريقة معينة.
لو مردش بالطريقة الصح → المتصفح يمنع الطلب.

طيب نحلها إزاي؟ ​

عندك حلين يا هندسة

استخدم Proxy Server​

الفكرة بسيطة: بدل ما المتصفح هو اللي يطلب، خليه السيرفر بتاعك يطلب البيانات من الموقع التاني.
كده العملية هتبقى بين Server to Server ومش هيقابلك أي CORS Error.

ضبط إعدادات CORS Headers في السيرفر​

لو عندك صلاحية على الموقع اللي بتطلب منه، خليه يضيف في الرد شوية Headers تقول إن موقعك مسموح له يعمل طلبات.
زي مثلاً:

Access-Control-Allow-Origin: https://yourwebsite.com

وكمان ممكن تحدد أنواع الطلبات المسموح بيها زي GET أو POST.

​

الموضوع بسيط جدًا لما تفهم فكرته.
CORS معمولة علشان تحميك وتحمي المستخدمين، مش علشان تعقدك
لو واجهت المشكلة دي، استخدم Proxy أو فعّل CORS Headers في السيرفر، وهتلاقي كل حاجة اشتغلت تمام