نصائح للأنترفيو كويسة جداً للى عاوز يستعد لمقابلة عمل

لو انت خريج جديد و خرجت اخيرا من zone الميلات اللي فيها اكتر جمله تقيله عالقلب you are rejected و لما يبقا حنين يقولك unfortunately اللي هوا يخساره كان نفسنا نخدك طب متخدني يخساره ليه المهم انه وصلت اخيرا لاول انترفيو ليك
هقولك علي 7 حاجات تخلي بالك منها قبل متروح الانترفيو هيساعدوك تعدي الموضوع بسلاسه اكتر :

اولا كده انت مش عبد حبشي حتي لو كنت حديث التخرج فبلاش تخش بال mentality دي ادي لنفسك قيمتها عشان اللي قدامك يعرف يقدرك

تاني حاجه لازم تخش و انت عارف انت عايز ايه بالظبط هل الشغل ده انت رايحه و شايف أنه هيفيدك فمسيرتك قدام و لا رايحه بتفكير ده احسن من مفيش لازم تبص لقدام و تعمل خطه لنفسك انت مستني ايه من الشغل ده و هل فعلا الشغل ده هيديهولك أو حتي هيبقا خطوه مساعده للي عاوز توصله

تالت حاجه تحسب صافي المرتب اللي هيخشلك هنقول انك مقدم اونلاين و متعرفش أو مدورتش علي موقع الشركه اتبعتلك انترفيو لازم تشوف موقع الشركه تحسب الوقت اللي هيضيع فالمواصلات و لو هتجيب اكل هيبقا تقريبا بكام فلوس المواصلات رايح جاي تحسب كل اللي هتصرفه عشان تروح الشغل مع الوقت اللي هيضيع فيومك اد ايه فالمواصلات علي أساسه تحط minimum للمرتب عشان لو اتسألت علي المرتب اللي متوقعه ده طبعا حاجه من الحاجات من اللي بتحسب عليها غير average المرتبات لمجالك و لمستوي خبرتك و رينج المرتبات فالشركه اللي رايح عليها و ده بشويه سيرش اونلاين لو حابين ممكن اكلمكو عنه فبوست لوحده

رابع حاجه مهمه جدا جدا اهتم بشكلك العام و هيئتك مش لازم تكلف نفسك بس خليك مهندم يعني

خامس حاجه اكيده ترتب اجابات لاسئله ممكن تتسألك عشان يبقا ردك واضح و مش متردد و تبقا داخل واثق اكتر من نفسك البوست الجاي هيبقا عن اشهر اسئله بتتسال و افضل اجابات ليها هديك الخلاصه

سادسا تعمل سيرش عن الشركه ايه هي الmission و الvision بتاعتها تشوف اخر اخبارها تعرف ايه الservices اللي بتقدمها و ايه هي متطلباتهم فالوظيفه اللي مقدم عليها عشان يحسو باهتمامك فعلا بالشغل اللي مقدم فيه و عندك معلومات عن شغل الشركه و نظامها

سابعا لو فيه حاجات مش واضحه بالنسبالك عن الوظيفه فجهز قبل متروح اسئله فاخر الانترفيو تسألها سواء عن الوظيفه أو بيئه العمل
نصيحه اخويه حاول متقلش اوي فالاكل قبل الانترفيو عشان بطنك متكركبش و يريت بلاش تبلبع عشره لتر ميه قبل متخش
و طبعا حاجه بديهيه مش هنبوظ ده كله بانك مسمعش المنبه و واصل متأخر عن المعاد يفضل نوصل عشر دقايق او ربع ساعه كمان قبل المعاد