- بواسطة x32x01 ||
" 13 جملة ممكن يكونوا السبب إنك ماتعدّيش من الانترفيو ... "
"معلش، أصل أنا متوتر شوية بس"مافيش شركة هتهتم تعين واحد مش واثق من نفسه، حتى لو كنت متوتر اعمل نفسك واثق، بس ماتأفورش علشان ماتتفضحش.
"هتدوني كام بالصلاة ع النبي"
لو اتكلمت في الفلوس بدري هتدي انطباع انك جاي تشتغل علشان الفلوس بس وهيحسوا انك مش مهتم بالشغل نفسه ودي حاجة مش كويسة. خلي الكلام عن الفلوس والاتفاق اخر حاجة خالص.
"نقطة ضعفي اني بشتغل كتير أوي"
ما تطّوعش وتتكلم عن عيوبك او نقط ضعفك الا لو اتسألت عنها، ولو اتسألت فكر كويس واعترف بعيوبك الحقيقية. بلاش جو انا نقطة ضعفي اني طيبة وبثق في الناس بسرعة.. انت مش بنت في اولى جامعة بتلعب سبن ذا بوتيل.
"انا فعلا محتاج" الشغل دا"
طب يحنن يابني! انت رايح تشتغل مش تشحت والشركة بتبقى محتاجة ناس حابة الشغل وعايزة تكمل في الكارير دا، مش مجرد مصدر يجيب منه فلوس وخلاص.
"بصراحة شغلي/مديري زي الزفت"
تفتكر ممكن تسيب اي أنطباع ايجابي لما تشتم في مديرك او شغلك السابق؟
"انا عايز....."
ماتتكلمش كتير في انت عايز ايه ... اهتم اكتر بانك تتكلم في اد ايه انت هتنفع الشركة وهتفيدها من الاخر يعني "ماتقولش ايه اديتنا مصر، قول هندي ايه لمصر"
"لامؤاخذة بس هو الانترفيو هيخلص امتى؟"
ماتديش انطباع للي قدامك بانك مستعجل وعايز تمشي، الانترفيو ممكن يكون متحددله نص ساعة بس تكون الحياة ماشية كويس فممكن يدخل في ساعة وهو مبسوط بيك، انك تديله انطباع انك مستعجل ممكن ساعتها يقولك طيب اتفضل، بس تأكد انك مش هتسيبه وهو مبسوط!
"هو مش فؤاد شغال هنا برده؟"
اكيد مش هينبهر بيك لما تقوله انك حابب الشركة عشان الاوفيس بوي بيقولوا بيعلم نسكافيه حكاية!
"ممكن ماجاوبش ع السؤال دا؟"
طول ما السؤال طبيعي وفي اطار الشغل جاوب! مش دا الوقت اللي تلعب فيه بورقة " الشاب الغامض" اللي البنات عايزين يعرفوا حكايته ايه
"هو انا ليّا كام يوم اجازة في الشهر ممكن اغيبهم؟"
فعلا؟ بتسأل عن الايام اللي ممكن تقعد فيها في البيت ويبقى قبضك شغال من اول يوم شغل؟
"معلش في اللفظ يعني دي حاجة ...."
افتكر انك في انترفيو في شركة وماتستخدمش اي الفاظ دارجة بينك وبين صحابك ع القهوة مهما لايكون الشخص اللي قدامك ودود معاك. خليك محترم جدا واوعى تستخدم "معلش يعني في اللفظ .. " هو مش محتاج يسمع اللفظ اللي انت بتعتذر عنه.
"اصلي لسه مفركشة/حامل/ ظروفي الايام دي مش اد كده"
حياتك العائلية ومشاكلك دي تخصك لوحدك، اكيد ماتخصش الشركة اللي انت لسه أول يوم تدخلها النهاردة
"لا والله ماعنديش اسئلة، انتو ناس فل الفل"
ما يقولك عندك اسئلة اسأل وماتتكسفش، حسسهم انك مهتم جدا بالشغل وعايز تعرف تفاصيل اكتر ولازم تكون محضر اسئلة قبل الانترفيو
التعديل الأخير: