تحسين أداء وسرعة الموقع Performance Optimization

[x32x01]

تخيل معايا إنك شغال على مشروع React كبير وكل ما المشروع يكبر وتضيف حاجات جديده الموقع يبقي بطيئ معاك، وكل render بياخد وقت طويل. هنا بييجي دور حاجة مهمة في ريأكت وهي الـ performance optimization.

لما بدأت أشتغل في React كنت زي أي حد شغال بضيف components واعمل state management ومش واخد بالي إن كل خطوة بعملها بتأثر على أداء التطبيق. بس مع الوقت وبالذات لما المشروع كبر بدأت أحس بالمشكلة. دلوقتي هشارك معاك الاستراتيجيات اللي اتبعتها لتحسين أداء الموقع.

1. الـ React.memo – حل أزمة الـ Unnecessary Renders​

أول حاجة لازم تفكر فيها هي إنك تمنع components من إنها تعيد render على الفاضي. يعني إيه؟ يعني أوقات بتلاقي إن component بيرندر من غير ما يكون فيه تغيير حقيقي في الـ props. الحل هنا هو React.memo. ببساطة بتقوله لو الـ props مفيهاش تغيير، بلاش ترندر تاني.
كأنك بتقول لصاحبك لو مفيش حاجة جديدة، بلاش تعيد نفس الكلام، وهنا بتوفر كتير من وقت الـ re-rendering اللي ممكن يحصل.

2.الـ useCallback و useMemo :​

الحاجة اللي لازم تعرفها إن كل render بيعمل إعادة إنشاء لكل functions وvalues. بس مش منطقي تخلق function من أول وجديد لو هي نفس الـ function اللي إنت محتاجها, صح؟
- مع useCallback بقا إنت بتعمل cache للـfunctions بحيث لو نفس الدالة بتستخدم، مش محتاج تتعمل من جديد.
- مع useMemo نفس الفكرة لكن للـvalues. لو الـvalues متغيرتش يبقى خليها زي ما هي.
كإنك كل مرة بتعيد نفس الشغل اللي عملته قبل كده، بدل ما تستخدم اللي جاهز عندك. أكيد هتوفر وقت ومجهود لو استغليت الحاجة اللي موجودة بدل ما تبدأ من الصفر كل مرة.

3. الـ Lazy Loading – هيحسن وقت تحميل الـ Components ​

لما المشروع ال شغال عليه يبقى كبير ممكن تواجه مشكلة إن كل حاجة بتتحمل مرة واحدة وده بيخلي الصفحة تقيلة جدا. طب الحل اي؟ Lazy Loading يعني تحمل الـ components اللي المستخدم محتاجها دلوقتي بس، والباقي يتحمل لما المستخدم يوصل له.

4. الـ Code Splitting – هيخفف حمل الكود على المتصفح​

واحدة من المشاكل الكبيرة إن الكود بيبقى ضخم جدا وكل جزء منه بيتحمل حتى لو اليوزر مش هيستخدمه دلوقتي. الحل هنا هو Code Splitting، وده معناه إنك تقسم الكود وتخليه يتحمل بناء على الحاجة.
هتعمل كدا باستخدام React.lazy و Suspense، وهتلاحظ إن الصفحة بقت أسرع. لما تجربها هتشوف الفرق.

5. الـ Virtualization – هتخلي التطبيق يركز على اللي محتاجه بس ​

لما يكون عندك كمية بيانات كبيرة جدا زي lists أو tables ضخمة, إنك تعرض كل حاجة مرة واحدة هيبقى عبء على المتصفح. هنا بقى ييجي دور حاجة اسمها Virtualization.
ببساطة بتستخدم مكتبات زي react-window أو react-virtualized عشان تعرض بس اللي قدام عين المستخدم في الوقت الحالي. فبالتالي مش كل البيانات بتحمل مرة واحدة، وده بيحسن الأداء بشكل رهيب.

6.الـ Optimizing Reconciliation Process – هتقلل من المجهود اللي React بتعمله​

الـ React عندها عملية اسمها Reconciliation وده يعني مقارنة بين الـ Virtual DOM والـ DOM الحقيقي عشان تعمل تحديثات لما يحصل تغيير. الفكرة هنا إنك لو قدرت تقلل من التغييرات اللي بتحصل، هتقلل من وقت المعالجة اللي React بتحتاجه.
حاجة بسيطة زي إضافة key في الـ lists هتساعد React تفرق بين العناصر بسهولة وتعرف إيه اللي محتاج يتغير وده يحسن الأداء.

الخلاصة:
لو تطبيقك بيكبر ومحتاجه يبقى أسرع، الحلول اللي قولتها دي هتساعدك جدا. سواء كنت لسه بتتعلم React أو شغال على مشروع كبير، لازم تحط في اعتبارك إن performance مش حاجة ثانوية, ده جزء أساسي من نجاح أي frontend application.
وبكده نكون خلصنا شرحنا عن الـReact Performance Optimization. لو عندك سؤال أو استفسار، اكتب في الكومنتات.