5 خطوات هتخليك مبرمج أستراتيجى .. مش مجرد كاتب كود

[x32x01]

الكود اللي بنكتبه كل يوم يا صديقي بالظبط زي الشطرنج بالظبط كل خطوة فيها حسابات وترتيب ودايما بنفكر إيه اللي هيحصل بعد كدا. بس السؤال هنا هل إنت فعلا بتفكر 5 خطوات قدام؟ ولا كل همك تخلص التاسك اللي في إيدك؟
النهاردة هنتكلم عن التخطيط الاستراتيجي لشغلك كمبرمج وإزاي إنك تفكر بشكل أبعد من مجرد "إني أكتب الكود ده وخلاص".

1. فكر في الـ Scale قبل ما تكتب سطر كود​

ممكن تكتب كود النهاردة يشتغل كويس على عدد مستخدمين قليل، لكن بعد شهرين أو تلاتة لما العدد يزيد الدنيا كلها تقع منك. الحل هنا؟ إنك تفكر في الـ scalability قبل ما تبدأ في المشروع.
يعني اعمل اي ؟
- اختار البنية المناسبة من البداية لو متوقع عدد كبير من المستخدمين فكر في انك تبني الـ API بتاعك على أساس microservices بدل ال Monolithic. ده هيساعدك توزع الحمل وتتعامل مع الضغط بسهولة أكتر.
- مش كل كود لازم يتكتب بشكل معقد من الأول بس خلي في بالك إن كل عملية على قاعدة البيانات (DB Query) أو طلب HTTP هتكلفك وقت لما المستخدمين يزيدوا. استخدم الكاش (caching) في الأماكن اللي تقدر عليه.
- بل ما تكتب أول سطر كود في أي مشروع، خد 5 دقايق وفكر في المستقبل إزاي الكود ده ممكن يشتغل لو المستخدمين زادوا 100 مرة؟ جرب الحلول اللي هتوفر عليك إعادة بناء الكود بعدين.

2. البساطة هي المفتاح: Keep it simple​

دايما في إغراء إنك تستخدم أحدث التقنيات وأصعب الحلول عشان تحل مشكلة صغيرة. بس الحقيقة؟ البساطة دايما هي اللي بتنجح. الكود البسيط بيكون سهل في الصيانة والتعديل وفي الأغلب بيقلل من نسبة حدوث الأخطاء.
يعني اعمل اي ؟
- استخدم الـ "KISS" Principle: "Keep it Simple, Stupid". لما تلاقي نفسك بتكتب حل معقد اسأل نفسك: "هل في طريقة أبسط أقدر أعمل بيها ده؟"
- متحاولش تحل كل المشاكل من البداية باستخدام تقنيات ضخمة ومعقدة. دايما ابدأ بالحلول البسيطة وقابلية التطوير.
لو مطلوب منك تعمل شات بسيط في موقع، مش لازم تبدأ بعمل WebSocket مع Redis عشان شوية مستخدمين. استخدم AJAX في البداية لحد ما الـ traffic يزيد وبعدين فكر في تحسين الأداء.

3. توقع المشكلات قبل ما تحصل: Defensive Coding​

زي ما اللاعب في الشطرنج بيتوقع حركات خصمه قبل ما تحصل كمبرمج لازم تبني كودك بحيث إنه يتعامل مع المشكلات قبل ما تحصل.
يعني اعمل اي ؟
- Validate كل حاجة: ماتاخدش أي input من المستخدم على إنه صحيح 100%. دايما تحقق من صحة البيانات (validation) عشان تتجنب الأخطاء المحتملة.
- Handle Errors بذكاء: في لغة زي JavaScript، دايما استخدم try...catch حوالي الأكواد اللي ممكن تفشل. مش عايز الموقع يقع لمجرد إن فيه حاجة صغيرة حصلت غلط.
لو بتتعامل مع API خارجي لازم تتوقع إن الـ response ممكن يكون فيه خطأ أو يتأخر. استخدم timeout أو error handling عشان ما يتوقفش موقعك بالكامل بسبب مشكلة في مكان تاني.

4. التعاون مع الفريق: المبرمج الشاطر مش لوحده​

زي ما فريق الشطرنج بيشتغل على تكتيكات مشتركة الفريق بتاعك كمبرمج بيشتغل سوا عشان يوصل للهدف. لو كل واحد اشتغل لوحده النتيجة مش هتبقى مرضية.
يعني اعمل اي ؟
- استخدم Git بشكل محترف مش بس ترفع الكود، لا استخدم الـ branches عشان كل زميل يشتغل في مساحته الخاصة من غير ما يحصل مشاكل أو تداخل في الكود.
- Code Reviews: قبل ما ترفع كودك اعرضه على زميلك. هتستفيد من رؤيته ووجهة نظره المختلفة وممكن تكتشف أخطاء ما كنتش واخد بالك منها.
خليك دايما مستعد للتعاون مع زمايلك. سواء بالتعليق على الكود بتاعهم أو إنك تسألهم على رأيهم في الكود بتاعك. دايما فريق أقوى = شغل أحسن.

5. التطوير المستمر: مش مجرد خطوة وتنتهي​

المبرمج الناجح دايما عنده استعداد لتطوير نفسه. زي ما في الشطرنج اللاعب لازم يتعلم من كل مباراة ويلعب أحسن في اللي بعدها المبرمج لازم يتعلم من كل مشروع.
يعني اعمل اي ؟
- اسأل على Feedback بعد كل مشروع اسأل تيمك أو مديرك على رأيهم مش بس في النتيجة النهائية لكن كمان في طريقة شغلك. إيه اللي ممكن تطوره؟
- التجربة أهم من الكمال مش لازم الكود بتاعك يكون مثالي من أول مرة. دايما في مساحة للتطوير والتحسين. الكود هو رحلة مش وجهة.
لو اشتغلت على مشروع معين وخلصته خد وقتك راجع الكود تاني وشوف إزاي ممكن تحسنه أو إيه اللي ممكن تكتسبه من التجربة دي للمشاريع الجاية.

الخلاصة يا صديقي: الشطرنج بيتلعب بخطة وذكاء زي الكود بتاعك بالظبط كل خطوة بتفرق في نتيجة المشروع. خلي تفكيرك دايما أبعد من مجرد التاسك الحالي وخطط لشغلك عشان يكون جاهز للمستقبل.