- بواسطة x32x01 ||
أنت كمبرمج أزاى تحدد سعرك (للمبتدئين) ؟!!لاحظت كتير من المصممين وخصوصاً المبتدئين مش بيبقى عارف يحدد سعر الموقع او تلاقي كومنت " تعالى هعملك الموقع ب ١٥٠٠ جنيه مصري"
عشان كده في الموضوع ده هوضح ليك ازاي تحدد سعر الخدمة الي بتقدمها، ولأن السعر بيتفاوت من شخص الى اخر فاحنا ممكن نقسمها للتالي:
1- نوع الموقع: هل الموقع الي هتنفذه هو
- موقع تعريفي لشخص مع خدمات بسيطة: وليكن مثلا عبارة عن ٣ صفحات زي الرئيسية، الخدمات، التواصل " في حالة زي كده ممكن تبدأ بسعر 120 - 160 $ " (بدون استضافة ودومين او ثيم وبلجن مدفوع)
- موقع تعريفي لشركة بخدمات متوسطة: وليكن مثلا ٥ـ٧ صفحات زي الرئيسية، من نحن، الخدمات، أعمالنا، تواصل معنا " في حالة زي ديه ممكن تبدأ من 140 - 200 $ " (بدون استضافة ودومين او ثيم وبلجن مدفوع)
- موقع تعريفي لشركة بحجم أعمال كبير: اكثر من ٧ صفحات " في حالة زي ديه هتكون بداية من 200 $، حسب المطلوب " (بدون استضافة ودومين او ثيم وبلجن مدفوع)
- متجر الكتروني بسيط؛ مكون من ٣ صفحات زي الرئيسية، المنتجات، تواصل معنا " في حالة زي ديه ممكن تبدأ بسعر 140 - 180 $ " (بدون استضافة ودومين او ثيم وبلجن مدفوع)
- متجر إلكتروني مع أقسام وصفحات متعددة " في حالة زي ديه هتشوف ايه حجم الشغل وتحدد على اساس الي قلناه " (بدون استضافة ودومين او ثيم وبلجن مدفوع)
3- عدد الساعات المقدرة في تنفيذ المطلوب
: هتشوف عدد الساعات الي ممكن المشروع ده ياخده وتحدد سعر ساعة ليك وليكن مثلا من 5-10 دولار للساعة وتضربهم في عدد ساعات الشغل الفعلي من غير راحة.4- تحسب سعر الثيم والاضافات الي هتستخدمها وتزود سعرها على سعر تصميم الموقع او تبلغ العميل بيها قبل الاتفاق
نيجي بقى لمستوى أعلى شوية
نقول مثلا انك مش بتقدم للعميل خدمة تصميم الموقع فقط، بل بتقدم معاها كمان حجز الاستضافة والدومين
والأفضل ان العميل هو الي يشتريهم بنفسه ويدخل بياناته كاملة وانت تستلم اليوزر والباسوورد
طيب افترض ان العميل مش هيعرف يحجز الاستضافة ؟
في الحالة ديه هتحسب سعر الموقع لوحده وتضيف عليهم سعر الاستضافة والدومين الي هتشتريها للعميل وهاتهم افضل حاجة زي ما يكون الموقع ده ليك، وبعد ما تضيفهم ممكن تزود عليهم خدمة الحجز وتقدم سعرك للعميل شامل الموقع و الاستضافة والدومين وخدمة حجز الاستضافة.
طيب تحب نوصل لمستوى اعلى كمان ؟
ايوه، طيب ايه رأيك تعمل للعميل باكج كامل - يعني ايه؟
بص يا سيدي مش انت بتقدم خدمة تصميم المواقع وحجز الاستضافة والدومين ، طيب ايه رأيك تضيف كمان عليهم انشاء ايميلات احترافية خاصة بالشركة
وايه رأيك لو تتفق مع الشركة انك تنفذلهم كل حاجة - من أول اللوجو للهوية البصرية مع البورتفوليو وتصميم الموقع والايميلات ، وطبعا مش كل الشغل ده هتعمله لوحدك لأنك هتاخد وقت طويل عشان تخلص كل ده فمن الممكن تستعين بأحد أصدقائك في مجال ال graphics design وال visual identity وتستشيرو بعض على تكلفة المشروع وتشتغلو على المشروع سوا
وبكده هتقدم للعميل باكج كاملة وكمان هتبقى ساعدت غيرك انه يشتغل معاك وهتبقى win to win strategy
شاركنا بتجربتك! ما هي النصائح التي تقدمونها للمبتدئين لتحديد أسعار عادلة؟ شاركنا برأيك في التعليقات
اتمنى تكونو استفدتم وبالتوفيق دائما
التعديل الأخير: