قد تتغير موضة التقنية بين ليلة وضحاها ...

الموضة الجديدة في عالم التقنية: من الميتافيرس لـ ChatGPT​

فاكر الترويج الرهيب اللي كان للميتافيرس و الـ Web 3.0 من فترة؟ كانوا بيصوروك إن لو اتعلمت المجال ده هتبقى أسطورة في عالم البرمجة! دلوقتي الموضة اتغيرت، بقى الكلام كله عن ChatGPT والذكاء الاصطناعي. بس السؤال: هل لازم نمشي ورا كل موجة جديدة؟

الثورات التقنية المتكررة​

لو رجعنا ورا شوية هنلاقي إن اللي بيحصل دلوقتي مجرد حلقة متكررة:

• ثورة التطبيقات
• ثورة التجارة الإلكترونية
• ثورة الـ VR/AR
• ثورة العملات الرقمية و الـ NFT
• ثورة الأمن السيبراني والهجمات الإلكترونية
• ثورة الويب 3
• وأخيرًا: ثورة الذكاء الاصطناعي و ChatGPT

كل شوية بيظهر "تريند" جديد، ومعاه ترويج ضخم يخليك تحس إن ده هو مستقبل الوظائف الوحيد.

المشكلة الحقيقي​

الترويج الكبير اللي بيحصل على تويتر وغيره ممكن يخليك تدخل في حالة ارتباك، وتفكر توقف اللي بتتعلمه وتسيب مجالك عشان تجري ورا الموضة الجديدة. وبعد شوية، الموجة دي تختفي وتيجي غيرها. النتيجة؟ تشتت وضياع وقت ومجهود.

مثال: كان فيه ناس مقتنعة إن الويب 3 هو المستقبل الذهبي للوظايف. طب النهارده، هل في فرص حقيقية للشغل بالويب 3 في منطقتنا؟ الإجابة: شبه مستحيل.

هل التقدم ده كله كذب؟​

لأ طبعًا! الذكاء الاصطناعي و ChatGPT تطور حقيقي، والنتائج واضحة قدامنا كل يوم. لكن الفكرة إنك ما تخليش "الموضة التقنية" تشغلك عن هدفك الأساسي. الاستمرارية هي سر النجاح، وهي اللي بتوصلك لنتيجة، مش إنك تجري ورا كل مجال جديد.

الخلاصة​

• التطورات التقنية مستمرة وده شيء طبيعي.
• السوق ما بيتغيرش بين يوم وليلة زي تريند تويتر.
• ركّز في مجالك اللي بدأت فيه، وطوّر نفسك فيه باستمرار.

خليك ثابت في طريقك، وسيب الترندات تمر. النجاح مش للّي يجري ورا كل موجة، النجاح للّي يكمل في طريقه لحد ما يوصل .