هل الذكاء الاصطناعي هيأثر على المبرمجين في 2026؟

لو إنت Software Engineer أو مهتم بالـ AI بشكل عام، فالبوست ده مهم جدًا ليك
خصوصًا بعد كل اللي اتقال واتكتب السنة دي عن إن الذكاء الاصطناعي هيقضي على شغل المبرمجين

خليني أقولك الخلاصة بهدوء، وبناءً على اللي حصل فعليًا مش وعود وخلاص.

المحور الأول: وعود كدابة من شركات كبيرة​

فيه شركات AI طلعت علينا بوعود ضخمة:

• AI هيستبدل المبرمج
• مفيش احتياج لـ Software Engineers

والحقيقة؟ ولا حاجة من ده حصلت.

حتى تسريحات الشركات الكبيرة زي أمازون وغيرها، ملهاش علاقة مباشرة بالـ AI
دي كانت:

• فشل إداري
• قرارات توسع غلط
• ضغط من المستثمرين

والـ AI كان شماعة حلوة يلبسوها الغلط

---

المحور التاني: عدد وظائف المبرمجين هيقل ولا هيزيد؟​

خليني أقولها صريحة: عدد وظائف المبرمجين هيزيد… ومش شوية
ليه؟

• في السنتين اللي فاتوا اتعملت مشاريع AI بسرعة رهيبة
• ناس كتير اشتغلت بنظام “شقلب واقلب”
• دخل عملاء قبل ما السيستم يبقى مظبوط

وبعد شوية؟
المشاكل ظهرت
الأداء وقع
السيستم بقى محتاج شغل تقيل

وهنا بقى المفاجأة
تصليح الشغل الغلط أصعب بكتير من إنك تبني حاجة من الأول
يعني بدل مبرمج واحد: محتاج 3 أو 4

---

​

المحور التالت: مين الشخص اللي السوق هيتخانق عليه؟​

دلوقتي:

• المعلومة بقت سهلة
• أي حد يقدر يوصل لأي حاجة في دقيقة

بس اللي مش سهل:

• اللي عنده أساس قوي
• اللي فاهم قبل ما يستخدم AI
• اللي يعرف يسأل صح

زي بالظبط: من زمان فيه كتب وفيديوهات عن صناعة العربيات
هل كل اللي شافها صنع عربية؟
أكيد لا.
المصادر عمرها ما كانت المشكلة… الكسل هو المشكلة

---

​

المحور الرابع: التشتت… العدو الحقيقي​

ممكن تبقى:

• ذكي
• شاطر
• فاهم AI كويس

بس لو متشتت:
مش هتتحرك
مش هتتقدم
هتفضل واقف مكانك

الـ AI مش خطر التشتت هو الخطر الحقيقي

---

​

تعمل إيه السنة الجاية؟​

• ذاكر زي ما انت… بس بذكاء
• استخدم AI يساعدك مش يفكر بدل منك
• ركز على هدف واحد كل 3 شهور
• متجريش ورا شخص واحد وتقلده
• خد من كل واحد اللي ينفعك وسيب الباقي

النجاح مش خلطة واحدة .. النجاح تجميع خبرات + تنفيذ + صبر

---

​

الخلاصة​

• AI مش هيقضي على المبرمجين
• اللي هيقع هو اللي ملوش أساس
• اللي هيكسب هو اللي فاهم وبيطوّر نفسه
• السوق محتاج Software Engineers أكتر من أي وقت