عيوب No Code و AI Builders وهل هتلغي المبرمجين

عيوب ومشاكل No-Code Application
كتير ناس بتسأل: هل أدوات No-Code و AI Builders هتلغي المبرمجين؟
الإجابة القصيرة: لا
والإجابة الطويلة محتاجة نفهم الصورة كاملة، وده اللي هنعمله هنا واحدة واحدة

أدوات No-Code بتوعدك إنك تعمل موقع أو تطبيق من غير ما تكتب سطر كود، وده شكله مغري جداً
بس هل الموضوع فعلاً سهل وآمن؟ ولا وراه مشاكل كبيرة؟

مميزات No-Code و AI Builders ​

خلينا نكون منصفين الأول، الأدوات دي ليها مميزات حقيقية:

• لو معندكش أي خبرة، تقدر تطلع موقع في دقايق
• تكلفتها أقل شوية من إنك تشغل مبرمج في البداية
• بتشوف الشكل قدامك وتعدّل في أي وقت بسهولة
• ممتازة لو عايز تطلع MVP سريع وتجرب فكرة

وده السبب إن ناس كتير بتتحمس وتبدأ بيها

---

​

أول مشكلة حقيقية: الأمان ​

أغلب منصات No-Code و AI Builders زي Replit أو v0 بتنّفذ اللي انت بتقوله وبس
يعني إيه؟ يعني لو قلتله: اعملي موقع أبيع عليه منتجات رقمية
هو هينفذ الفكرة من غير ما يفكر في التأمين
لا تشفير، لا حماية، لا Validation حقيقي… إلا لو انت طلبت ده صراحة

مثال بسيط على مشكلة أمنية مش بياخدوا بالهم منها

// كود تسجيل دخول بدون أي حماية
app.post('/login', (req, res) => {
  const user = users.find(u => u.email === req.body.email);
  if (user.password === req.body.password) {
    res.send("Logged in");
  }
});

مفيش Hash
مفيش Rate Limit
مفيش CSRF Protection
وده خطر جداً على أي موقع حقيقي

---

​

الاعتماد الكامل على بيئة واحدة (Vendor Lock-in) ​

منصة v0 مثلاً بتطلع كود مبني بشكل أساسي على:

• Shadcn UI
• Tailwind CSS
• بيئة Vercel

المشكلة بقا
لو قررت في يوم تنقل الموقع على سيرفر خاص أو شركة تانية، هتدخل في دوامة
الكود بيكون متفصل على مزاجهم، وتعديله أو فكه بياخد وقت ومجهود كبير

---

​

الأسعار بتبدأ حلو… وبعدين تصدمك ​

معظم منصات No-Code بتبدأ:

• مجانية
• أو بـ 10$ – 20$

بس أول ما مشروعك يكبر شوية تلاقي الأسعار بتزيد بشكل مرعب (Exponential)
اللي كان بـ 10 دولار يبقى فجأة بـ 200 أو 300 دولار عشان بس الموقع يفضل شغال!

---

​

كود كتير مالوش لازمة (Redundant Code) ​

الذكاء الصناعي ساعات بيحل مشكلة بطريقة غلط
يكرر كود - يزود تعقيد - يبني حلول أكبر من اللازم
النتيجة؟
كود ضخم
صعب الفهم
صعب الصيانة
وأي مبرمج يدخل بعد كده يمسك الكود… هيشتم

---

​

مشاكل قواعد البيانات وتسريب البيانات ​

أغلب المنصات دي بتستخدم قواعد بيانات زي Supabase لو معندكش خبرة في:

• Row Level Security
• Service Role Key
• Permissions

فانت حرفياً بتلعب بالنار
غلط صغير في الإعدادات = تسريب بيانات اختراق ضياع ثقة المستخدمين

---

​

مفيش Engineering حقيقي ​

ودي أخطر نقطة
No-Code و AI Builders مستحيل تبني بيهم نظام معقد زي:

• إدارة مخازن
• نظام محاسبة
• ERP
• سيستم فيه حسابات ومعدلات معقدة

ولو حاولت؟ هتدفع فلوس أكتر من إنك تبني السيستم من الأول بفريق مبرمجين

---

​

الخلاصة النهائية ​

• AI Builders ممتازة لو انت مبرمج
• مفيدة جداً لو مش مبرمج وعايز MVP
• تنفعش خالص لمشروع كبير أو طويل المدى
• مش هتلغي المبرمجين… بالعكس، هتزود الطلب عليهم

الأدوات دي مساعد مش بديل