أنا بشتغل في مجال x بقالي سنين ونفسي أغير للسيكيورتى

[x32x01]

أنا بشتغل في مجال x بقالي سنين ونفسي احول للسايبر سكيورتي, بس خايف اني لما احول منجحش فيه وابقي ضيعت سنين خبرتي في مجالي الحالي, اعمل ايه؟

انك تمشي ورا شغفك دي حاجة جميلة وبنسبة كبيرة هتنجح طالما واخد اي مجال عن حب, بس خطورة الانتقال دي محتاج تحسبها كويس قبل ما تاخدها خصوصا لو عندك أسرة, فخليني الخصلك اجابتي في خمس نقط:

1. اتكلم الاول مع حد شغال بقاله سنين في مجال السايبر سكيورتي (أو اي مجال عايز تحوله) قبل ما تقرر تحول وخليه يحكيلك بيعمل ايه بشكل يومي واسبوعي وشهري عشان يبقي عندك فكرة كاملة, جايز اللي عندك انبهار مش حب للمجال ده, فكلامك مع اللي شغال فيه بقاله سنين هيوضحلك الدنيا كويس
2. اشتغل علي نفسك بحيث مستواك يؤهلك للعمل في المجال الجديد حتي لو ك Junior, ولو المجال ده محتاج شهادات يبقي ادرس علي الاقل شهادة منهم وانت لسه فمكانك
3. لو شركتك الحالية فيها فريق ساسيبر سكيورتي, اتكلم معاهم واطلب منهم بشكل ودي انك تشتغل معاهم في تاسكات من وقت للتاني بشكل تطوعي. ده هيديلك خبرة عملية وهيخليك تجرب كل حاجه بايدك ويديلك كمان فرصة الشغل في المجال وتوفر علي نفسك البحث عن تدريب فشركات, والأهم من ده كله مش هتبقي سيبت مكانك وجايز شغلك يعجبهم وتنقل داخليا جوه نفس الشركة.
4. لو شركتك الحالية ستارت أب او شركة صغيرة مثلا, ففلغالب مفيهاش فريق سايبر سكيورتي. تعمل ايه في الحالة دي؟ انت ذاكرت شهادة زي ما قولنا واشتغلت علي نفسك, اعرض بقي علي مدير الشركة او مدير ال IT انك تعملهم تاسكات خاصه بالسكيورتي, زي مثلا عملية اختبار اختراق لموقع الشركة او انك تجرب تشغل Security Scanner زي Nessus مثلا جوة شبكة الشركة عشان تطلعلهم الثغرات الموجودة. ده هيعجبهم اكيد, وهما في الغالب اللي هيعرضو عليك تنقل ك security engineer جوه الشركة لانه مفيش شركة حاليا مش مدركة أهمية السايبر سكيورتي وبكده تبقي وفرت لنفسك وظيفة من غير ما تاخد خطورة النقل وهيبقي عندك فرصة ترجع لنفس مجالك لو الدنيا معجبتكش.
5. مفيش حل من اللي فاتو دول ماشي مع ظروفك الحالية ولازم تبدأ تدور علي شركة تانية يكون عندهم وظيفة في السايبر سكيورتي؟ يبقي قبل ما تسيب شركتك الحالية حوش فلوس تكفيك تصرف علي نفسك أو علي اسرتك لمدة لا تقل عن 6 شهور بدون دخل عشان لو حصل اي ظرف لا قدر الله. كمان مهم جدا انك متقدمش استقالتك من وظيفتك الحالية غير لما تكون خلاص لقيت الوظيفة المناسبة ومضيت مع الشركة تانية.

في الأخير الرزق بإيد ربنا سبحانه وتعالي, واحنا بناخد بالأسباب وبنعمل اللي علينا وبنسعي وبس. لكني حابب ااكد علي النقطة رقم 5, انك لو معكش اللي يغطيك انت واسرتك ما لا يقل عن ست شهور بدون وظيفة يبقي متنقلش مجال تاني, مبنتكلمش هنا عن نقل وظيفة, بنتكلم عن نقل مجال مختلف تماما, فركز في رقم 5 كويس.