الفرق بين الموقع الوردبريس والموقع المبنى بـ البرمجة ؟!

ناس كتير بتسأل اي الفرق بين الموقع الإلكتروني المبني باستخدام ووردبريس والموقع الالكتروني المبني باستخدام البرمجة ؟؟
الموضوع بسيط وسهل لو فهمناه كويس
موقع ووردبريس تخيل كده إنك عايز تبني بيت، بس بدل ما تجيب مهندس معماري وتشتغل من أول وتاني، انت بتشتري بيت جاهز وبتجهزه على ذوقك.
ده بالظبط اللي بيعمله موقع ووردبريس، هو بيدي لك قالب جاهز لموقعك، وبتقدر تزوده وتعدل فيه زي ما انت عايز، بس مش هتحتاج تبني كل حاجة من الأول.

موقع مبرمج أما الموقع اللي بيتعمل بالبرمجة، فده زي ما يكون بتبني بيت من الصفر، أنت بتختار كل قطعة فيه، بتصمم الشكل، وبتختار الألوان. ده بيديك حرية أكبر في التصميم والتعديل، بس بيحتاج وقت وجهد أكبر.

ملخص الفرق:
ووردبريس: أسهل وأسرع، بس محدود في التخصيص.
الموقع المبرمج: أصعب وأطول، بس بيديك حرية أكبر في التصميم.

طيب إيه الأفضل ؟
ووردبريس: لو كنت عايز موقع بسرعة ومش محتاج حاجات معقدة أو تصميمات خاصة جداً.
الموقع المبرمج: لو كنت عايز موقع فريد من نوعه، وبتتحكم في كل تفصيلة فيه، أو لو عندك متجر إلكتروني كبير محتاج ميزات خاصة.

ملاحظة: فيه أنواع تانية من المنصات زي الووردبريس، بس الفكرة الأساسية واحدة، إنك بتختار بين بناء موقع من الصفر أو استخدام قالب جاهز.
يارب يكون الشرح واضح، لو عندكم أي سؤال تاني اتفضلوا.