90% من المبتدئين في تعلم البرمجة يفشلوا لهذا السبب !

كتير من الناس بيبدأوا يتعلموا برمجة أونلاين، لكن الغالبية بتفشل وتسيب المجال. السبب مش إن البرمجة صعبة، لكن إن طريقة التعلم غلط. عشان كده جمعتلك 6 نقاط لو اتبعتها هتفرق معاك جدًا وتخليك تتعلم أسرع وبشكل أذكى.

1- استطلع الفيديو الأول​

في أول مرة تشوف فيديو تعليمي، ما توقفوش كتير. شوفه لآخره وخليك مركز على الفكرة العامة والكود اللي بيتشرح من غير ما تحاول تحفظه.

2- طبّق الفيديو بنفسك​

التطبيق أهم من المشاهدة. كل ما المدرب يكتب كود، وقف الفيديو وطبّقه زي ما هو. حتى لو حسيت الموضوع مكرر، ده اللي هيثبت المعلومة.

3- اختبر نفسك بالتغيير​

بعد ما تفهم المثال اللي في الفيديو، جرّب تغيّر فيه وتعمل نسخة مختلفة بنفس المفهوم. كده هتعرف هل انت فهمت فعلاً ولا لأ.

4- استخدم الورقة والقلم​

لو الفيديو فيه أكواد، جرب تكتبها بإيدك من غير ما تبص على الشاشة. الحركة دي بتخلي الكود يترسخ في دماغك أسرع من إنك تنسخه نسخ ولصق.

5- راجع المفاهيم بعد أيام​

بعد 3 أيام بالكتير، ارجع للكود اللي اتعلمته وشوف هل فاكره ولا نسيته. لو نسيته، عيد الخطوات من الأول. المراجعة المستمرة هتخليك تثبت المعلومة.

6- ما تستهلكش فيديوهات كتير​

مش لازم تشوف 20 فيديو في يوم واحد. كفاية 7 فيديوهات بالكتير، خصوصًا لو مواضيع مختلفة. الضغط الزايد بيخليك تحس إنك مش قادر وتسيب المجال.